ភ្នំពេញ៖ នាយករដ្ឋមន្ត្រីកម្ពុជា សម្ដេចតេជោ ហ៊ុន សែន ប្រាប់ទៅពិភពលោកថា ភាពចាំបាច់បន្ទាន់ក្នុងការរួមគ្នាទប់ស្កាត់ជំងឺឆ្លងកូវីដ-១៩ ក្នុងស្មារតីមនុស្សធម៌ស្មោះត្រង់ និងគ្មានរបៀបវារៈនយោបាយនៅពីក្រោយ ដើម្បីអាចចាប់ផ្ដើមដំណើរការសេដ្ឋកិច្ច សង្គមឡើងវិញប្រកបដោយសុវត្ថិភាព។

សម្ដេចតេជោថ្លែងបែបនេះ ក្នុងសន្ទរកថាជាលាយលក្ខណ៍អក្សរមួយ ចួលរួមក្នុងកិច្ចប្រជុំកំពូលកូវីដ-១៩ ជាសកល ដែលរៀបចំដោយប្រធានាធិបតីអាមេរិក លោក ចូ បៃដិន។ ក្នុងសារនោះផងដែរ សម្ដេចតេជោ ក៏បានសង្កត់ធ្ងន់ផងដែរលើសារៈសំខាន់នៃការរួមបញ្ចូលវ៉ាក់សាំងទាំងអស់ដែលអង្គការសុខភាពពិភពលោកទទួលស្គាល់ គឺជាយុទ្ធសាស្ត្រសកលដ៏ល្អ ដោយគ្មានការរើសអើង។

គិតត្រឹមថ្ងៃទី២១ ខែកញ្ញា ឆ្នាំ២០២១ ពិភពលោករកឃើញអ្នកឆ្លងជំងឺកូវីដ-១៩ ជិត ២២៩លាននាក់ ក្នុងនោះមានករណីស្លាប់ជាង ៤លាន៦សែននាក់ ខណៈប្រទេស៣ដែលមានចំនួនអ្នកឆ្លងច្រើនជាងគឺ សហរដ្ឋអាមេរិក ឥណ្ឌា និងប្រេស៊ីល៕